Хьоме махкахой!
Даггара декъалдо шу Нохчийн меттан денца!
ХIара де Нохчийчоьнан дерриге а халкъан дезде хилла дIахIоьттина. Иза даздо ерриге а гIаланашкахь, шахьаршкахь, кIошташкахь. ХIокху дийнахь адамаша къоман духарш тIедуху, ненан маттахь иллеш олу, эшарш лоькху, байташ йоьшу. Со воккхаве, сан самукъадолу оцу суьрте хьоьжуш.
Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин уггаре а коьртачу декхарех ду нохчийн мотт Iалашбар а, кхиор а. Оха дерриге а хьелаш кхоьллина ненан мотт массанхьа а бийцийта, Iамабайта, марзбайта. Ненан маттахь арадолуш газет, журналаш, книгаш ю вайн. Къаьсттина тидам тIебохуьйту къоман театр, эстрада кхиорна, телевиденехь а, радиохь а ненан мотт бийцийтарна.
Шен ненан мотт бицбича, дIатесча хIаллакьхуьлуш ду муьлхха а халкъ. Вайн сийлахь декхар ду ненан маттаца экаме юкъаметтиг хилийтар, иза тIекхуьучу тIаьхьенашна Iалашбар. ХIунда аьлча, ненан мотт вайн гIиллакхийн, оьздангаллин, эхь-бехкан, дайн Iадатийн бух бу. Мотт дIабаьлча, дIайовлуш ю и еза мехаллаш.
Даима а бехийла вайн халкъ дийна хиларан, ницкъах, доьналлех дуьзна хиларан коьрта билгало хилла лаьтташ болу нохчийн мотт».
Дезчу денца, хьомсара доттагIий!
«Вай даима дагахь латто деза къоман оьздангаллин могашалла дуьххьалд1а ненан матто латтош хилар»
(Р. Кадыров)
№ 74(2508)